Lalaki misunog sa balay sa iyang silingan

Usa ka panimalay ang naugdaw human gituyo og sunog sa ilang silingan niadtong Domingo sa udto diha sa Lamakan Sibonga Sugbu.

Ang panimalay nga naugdaw gipanag-iya ni Jacinta Diaz, 40, dunay kapuyo ug residente sa naasoy''ng lugar.

Gitumbok nga misunog sa panimalay ni Diaz nailhan sa kapolisan nga si Severino Antier, 43, minyo, usa ka mag-uuma sa nahisgutang dapit.

Base sa taho nga naglisod ang mga bombero sa Sibonga pagresponde sa balay ni Diaz tungod sa kalisod sa agianan hinungdan nga hingpit gyung naugdaw.

Ang panimalay ni Diaz ginama sa gooy nga materyales ug gibana-bana sa kapolisan nga mikabat og P50,000 ang danyos sa sunog.

Gituohan sa mga polis nga panimalos ang motibo sa pagsunog ni Antier sa balay ni Diaz.

Matud ni SPO3 Ramon Padilla sa Banat News nga sa wala pa mahitabo ang insidente, ang asawa ni Antier ug Diaz nagkalalis.

Nisuway og patunga si Antier aron unta uwangon ang duha nga nagkalalis apan kalit lang mitunga ang kapuyo ni Diaz ug sa walay igong rason gisumbag si Antier.

Kasong arson ang gitakdang ipasaka sa kapolisan batok ni Antier kinsa misibat human sa maong hitabo.