Bokal Mondigo walay kompiyansa sa kaatbang

Wala’y kompiyansa si Bokal Joven Mondigo sa iyang kaatbang sa pagka-mayor sa lungsod sa Medellin nga si Bise-Mayor Ricardo Ramirez.

Kini bisan og gitan-aw nga hayag ang kadaugan ni Mondigo kinsa dugay nga nag-alagad isip mayor sa lungsod sa wala pa siya nahimong sakop sa hunta probinsiyal sa Sugbu.

Matud pa sa anak niini nga si Atty. Joven "Venjun" Mondigo Jr. nga hasta tulo hangtod sa upat ka pulongpulong ang ilang ipahigayon matag adlaw gumikan sa ka wala nila’y kompiyansa batok sa grupo ni Ramirez.

Si Venjun kandidato usab sa pagka-sakop sa hunta probinsiyal sa ikaupat nga distrito ug maoy mohulip sa iyang amahan kinsa dili na makapasubli subay sa lagda sa balaud.

Si Mondigo ug Ramirez kanhi alalay sa politika ug giilang lider sa distrito mao si kanhi Kong. Celestino Martinez Jr.

Apan matud pa ni Venjun nga wala na sila kasabot sa pamolitika sa mga Martinez hinungdan nga sila mibuwag ug nakig-alyado kang Gob. Gwendolyn Garcia nga maoy nipukan kang Martinez sa niaging eleksiyon sa tuig 2004.

Si Ramirez maoy numero unong konsehal niadtong mayor pa si Mondigo samtang si Mayor Manreza Lim ang iyang bise-mayor.

Daku unta ang kahigayunan ni Ramirez nga mahimong mayor kon wala pa mabuak ang ilang grupo sanglit dili na makapasubli si Lim sa katungdanan.

Si Mondigo naaghat sa pagpapili human gihangyo ni Lim nga pabalikon sa pagka-mayor ug manaug siya isip bise-mayor.

Ang panagpares ni Mondigo ug Lim sa nangaging katuigan hayan mahibalik na usab sa pagdumala sa lungsod kon ilang maangkon ang kadaugan sa umaabot eleksiyon.