Bolo kuyaw iwani sa iyang distrito

Hayan mawani si Bokal Juan Bolo sa eleksyon karong Mayo diha sa unang distrito sa lalawigan sa Sugbu ug ang mogawas unya nga makasakay sa tiket sa pagka-bokal mao nalang sila si Walter Selma ingon man si kanhi bokal Julian Bacus Daan.

Una niini mitumaw ang mga pagduda sa mga tigpaniid sa politika diha sa unang distrito sa lalawigan nga dili gyud mabangbang ang kasikat ug ka-inilog gihapon ni Daan bisan paman kun wa na kini sa linya sa Alayon Party ni Kongresista Eduardo Gullas ug nag-independente nalang kini.

Base sa report, si Daan maoy labing inilog ug nag-una batok sa iyang mga kaatbang nga sila si incumbent board member Juan Bolo, Raul Bacaltos, ingon man Walter Selma nga usa sa kandidato sa Alayon.

Apan si Bolo dihang nahinabi sa Banat News miingon nga wala siya mabalaka ug mahadlok niini gumikan kay pulos lang kini mga tsismis sa politika gumikan kay base sa rekord sa mga nangaging eleksyon diha sa unang distrito wala pa mahitabo nga nangiwit siya batok kang Daan. Gani siya ug si Bacaltos maoy pirmeng mag-ilog sa numero uno ug dos.

Matud pa ni Bolo nga paabuton lang ang eleksyon pagsukod sa pulso sa katawhan.

Gipadayag niini nga wala gani siya mahadlok sa una niyang pagdagan diin huyang ug dili lig-on ang partido nga iyang gikauban unya midaog pa siya.

Gisalikway usab niini ang mga pagduda nga dili na siya dalhon sa kampo ni Gullas sa kataposang takna ug Selma si maoy hatagan og dakong pagtagad.