Saad ni Pacman natuman

Malampusong naprotektahan ni super featherweight superstar Manny Pacquiao ang iyang WBC International super featherweight title ingon man ang pagtuman sa iyang saad sa iyang mga kadugong Pilipino sa iyang tuyo''g tumong - pagkulit og KO nga kadaogan sa ikawalo nga hugna batok ni Jorge Solis atubangan mismo sa 14,793 libo nga misaksi didto sa Alamodome sa San Antonio, Texas.

Kini nahitabo bisan pa ug nasamdan si Pacquiao nga problema atol sa ilang sangka ni Solis. Human sa iyang nahiaguman nga accidental headbutt nga maoy hinungdan sa pagkagisi sa walang dapit sa iyang mata sa ika-unom nga hugna, kini wala mahimong babag sa tuyo ni Pacquiao. Hinuon misamot ka-agresibo si Pacman sa pagmakmak pag-ayo ni Solis .

Padayon si Pacman sa iyang gipakitang brutal nga pag-atake sa ikapitong hugna paingon na sa ikawalo diin iyang gipatikangkang si Solis makaduha.

Sa ikaduha nga higayon sa pagkalup-og pagbalik ni Solis, diin giiphan ni Referee Vic Drakulich si Solis apan pabilin gihapon kini nga naglingkod human sa pagkalup-og aron pagtapos sa kumbate sa oras nga nahibilin 1:16 sa ikawalo.

Gumikan sa maong kadaogan giinat ni Pacquiao ang iyang gihuptang rekord ngadto na sa (44-3-2, 34 KOs) samtang ang pilderong si Solis nakatilaw sa iyang unang kapildehang (32-1-2, 23 KOs) .

Ang mga judges sa maong kumbate mao sila si Larry O''Connell (England), Gale Van Hoy (Texas) ug Oren Schellenberger (Texas).

Sa laing binukbukay, sa supporting main event sa maong higanteng promosyon sa Top Rank ni Bob Arum, pakyas si two-time world champion Jorge "El Travieso" Arce sa iyang tinguha pagpuhal sa lig-ong haligi sa defending champion nga si Christian Mijares aron unta pagsuway pag-ilog sa bakus nga iyang gihuptan nga WBC super flyweight title, samtang yano ra kaayong gipukan ni Julio Cesar Chavez Jr. (31-0, 24 KOs) ang iyang kaatbang nga si Anthony Shuler (20-5-1,14 KOs). Iyang gipalukapa si Shuler makaduha sa ikaduhang hugna pinaagi sa pagbuhi og left hooks sa nahibilin nga 1:32 , Samtang pakyas nausab ang Fil-Am nga si Brian Villoria sa iyang tumong pagsakmit pagbalik sa nabakanteng titulo sa WBC light flyweight championship human kini pildeha ni Edgar Sosa (27-5, 14 KOs) .

Gumikan sa naangkon nga kaparotan ni Villoria nahagba kini ngadto na sa (19-2-1, 12 KOs), ang mga judges miiskor og 114-114, 115-113, 115-113 pabor kang Sosa aron pagkulit og majority decision. "I did enough to win, but he stepped it up in the championship rounds and that was the difference in the fight," padayag ni Hawaiian Punch Villoria.

Lain pang Pilipino nga si Bernabe Concepcion milampos sa iyang tumong pagkulit og daog batok sa sa taga Houston, Texas nga si Benjamin Flores sa ilang non-title fight sulod sa 10 ka hugna ubos sa featherweight division.

Ang mga judges miiskor og 97-93, 97-93, 96-94 pabor ni Concepcion , si Concepcion miinat sa iyang baraha ngadto na sa (20-1-1, 10 KOs) samtang ang pilderong si Flores mios-os sa (14-2, 4 KOs).