81 anyos napunggit sa PUJ patay

Patay ang usa ka tigulang lalaki human madasmagi sa naghaguros nga PUJ sa miaging gabii sa dalan M.L. Quezon, Mactan, dakbayan sa LapuLapu.

Giila ni SPO3 Bonifacio Montecillo ang biktima nga mao si Elueterio Impas, 81 anyos, minyo ug nagpuyo sa maong dapit.

Si SPO3 Montecillo miingon nga gimaneho ni Primo Imbeno Tujao, 56 anyos, minyo nga taga Mantawi Road sa Punta Rizal, Poblacion sa maong dakbayan ang PUJ nga pasaheroan nga nakadasmag sa biktima.

Matud pa ni Montecillo nga kusog nga nagdagan ang PUJ nga gimaneho sa suspetsado padulong sa barangay Mactan dihang ang biktima milabang sa pikas habig sa dalan ug nadasmagan nga maoy nakaingon sa pagkalagpot ug nadakdak ang ulo sa sementadong karsada.

Ang suspestado dali nga mikarga sa biktima sa PUJ ug gidala kini sa Opon District Hospital sa Carajay, Gun-ob sa maong dakbayan.

Milungtad lamang og pipila ka takna ang pagtambal sa biktima sa mga doktor apan nabugtoan kini sa iyang gininhawa.

Mitahan sa iyang kaugalingon ang suspetsado kang PO3 Jose Noel Nalzaron sa traffic section sa kapolisan sa maong dakbayan ug gibalhog karon sa bilanggoan.