Sakop sa TAU gipatay

Patay ang usa ka 27 anyos nga lalaki kinsa gikatakdang sakop sa Tau Gamma Phi Fraternity human pusila sa tulo ka mga batan-on gituohang sakop sa Alpha Kappa Rho Fraternity diha sa Villa Aloha, Subdivision, Looc Poblacion Liloan Sugbu.

Kini nahitabo atol sa pasko sa pagkabanhaw pasado alas 8 sa gabii.

Giila sa kapolisan ang biktimang si Narpol Lumapas minyo, usa ka factory worker nga taga White Rose, Yati sa sama nga lungsod.

Gitumbok nga nipusil mao ang tulo ka mga batan-ong lalaki nga gituohang sakop sa rival niining fraternity nga Akrho.

Sa pasiunang imbestigasyon sa kapolisan nagbutyag nga sa wala pa mahitabo ang insidente ang biktima katapusang nakit-an dunay gikainom sa Pepito Beach Resort nga nahimutang sa Jubay Liloan kauban ang tulo ka wala mailhing batan-on giingong mga miyembro sa Akrho fraternity.

Matud pang SPO2 Rizalino Aligno sa Liloan Police Station nga nahinabi sa Banat News niingon ang biktima nag-inusarang naglakaw gikan sa Poblacion paingon sa Villa Aloha Subdivision.

Kalit lang nilanog ang usa ka masipang buto sa pusil ang nadunggan sa mga residente sa nahisgotang dapit.

Niingon si SPO2 Aligno nga sa dihang gisusi sa mga residente ang gigikanan sa maong buto mao nalang ang nakit-an ang tulo ka mga lalaki ang yanong nanglakaw palayo sa nahitaboan.

Dihang gisusi kini sa mga residente nasuta nga ang biktima nagbuy-od sa dalan ug dunay pinusilan sa luyong bahin sa ulo.

Daling gidala sa Eversly Memorial Hospital sa Jagobiao Mandaue ang biktima ug gibalhin sa Vicente Sotto Memorial Medical Center diin siya nakabsan sa kinabuhi pipila ka gutlo ang nakalabay.

Matud ni Aligno padayon pa nilang giila ang tulo ka mga sakop sa Akrho nga maoy gitumbok nga responsable sa krimen. LAHUGAY SA CCPO Ni Edwin Ian Melecio

Dunay gikatakdang lahugay sa mga opisyales sa Cebu City Police Office ang direktor niini karong mosunod nga mga adlaw.

Si Sr.Supt. Patrocinio Comendador mitug-an sa Banat News nga ang lahugay ipatuman lamang kung tugutan na kini sa Comelec -Manila sanglit dunay memorandum ang maong buhatan nga gidid-an ang pagbalhin-balhin ug lahugay sa mga tropa sa gobiyerno atol sa election period.

Ang maong lahugay nasubay sa direktibang gipadangat sa Police Regional Office 7 ngadto sa ginsakupan kabahin sa pagpabalhin sa laing unit ang mga opisyal nga milapas na og duha ka tuig. Matud pang Comendador sila si Supt. Glenn Ares, hepe sa Parian Police Station ug Senior Inspector Doroteo Mantos, hepe sa Punta Prinsesa Police Station gikatakdang tangtangon na sa ilang pwesto.

Si Mantos giingong gikatakdang moretiro na karong Abril 18 samtang si Ares milapas na sa duha ka tuig ang termino pagka-hepe sa maong police station. Wala pa hinuon matino kung si kinsa ang mohulip sa maong mga opisyal sa ilang mabiyaang pwesto apan si Comendador sa pakighinabi mitug-an nga usa sa ilang opsyon mao nga si Ares maoy ihulip kang Mantos.