SK chair sa Day-as gipasaylo

Nakahukom si Day-as barangay captain Michael Ocleasa ug ang mga konsehal niini nga pasayloon ug isibog ang ilang giduso nga reklamo ngadto sa konseho sa siyudad sa Sugbu aron unta irekomendar nga ipataktak ang ilang Sangguniang Kabataan chairman nga si Rafonzel "Raffy" Quijano.

Natigayon kini atol sa gipatawag nga hearing kagahapong adlawa sa three-man committee nga gidumala ni Konsehal Jocelyn Pesquera isip chairman.

Nasayran nga ang konseho sa Day-as ubos sa pagpangulo ni Ocleasa mipasar og resolusyon sa barangay nga nag-awhag sa konseho pagtaktak sa ilang SK chairman.

Ilang gibasehan ang kanunay lang nga pag-absent ni Quijano sa ilang sesyon sa barangay diin gikan niadtong milabay''ng tuig nakahimo kini og siyam ka sunod-sunod nga absent ug laing walo ka sunodsunod nga absent ang gihimo niini karong tuiga wala pay labot sa iyang leave of absence.

Gawas kang Ocleasa mitambong sa maong hearing kagahapn sila si kagawad Antonio Cabrillas, Ben Caniga, Julia Lada, Freddie Esmer ug Anthony Daantun.

Gitug-an ni Ocleasa nga bisan pa sa kanunay nga pag-absent ni Quijano tungod kay kanunay kining atua sa Manila sa iyang bag-ong career nga pagkanta padayon gihapon nila kining gitugotan nga makakobra sa iyang binulan nga honorarium sa barangay nga tag P5,700.

Matud ni Ocleasa nakahukom sila nga isibog ang reklamo pagpalagpot kaniya ug pasayloon apan ubos sa kondisyon nga dili na mousab sa iyang mga nahimong kalapasan sama sa kanunay nga pagpalta sa sesyon.

Samtang apil sa ilang gikasabutan mao ang pagpabayad ni Quijano kun ugaling idis-allow sa gobyerno ang iyang pagsige og kobra sa honorarium bisan nagsige og absent.

Hinuon sa hearing kagahapon mitambong si Quijano.