Edigul misubli sa iyang pasalig

Gisubli ni Kongresista Eduardo Gullas ang pasalig niya ngadto sa mga gagmay’ng mananagat sa Talisay City nga dili sila mawad-an og panginabuhi.

"Ako kining gisaad kanila sukad pa niadtong ako pay mayor sa Talisay City," matud ni Gullas.

Giduaw ni Gullas ang maong proyekto uban sa kontraktor nga si Willy Te sa WT Construction diha sa sitio Sawsawan, Barangay Tangke, Talisay nga sugdan na niadto pang Septiyembre sa miaging tuig.

Ang maong proyekto nga gitakdang mahuman ning tuiga mahimong magastohan og P100 milyones matud ni Gullas.

Kini tungod kay dili lamang ordinaryong fish port ang tukoron diha sa Sawsawan, may pantalan usab para sa roll-on-roll-off (RoRo) nga mga barko para sa mga Talisaynon nga molabang ngadto sa LapuLapu City ug vice versa.

Matud pa ni Gullas nga sa palibot ning maong fish port may luna usab nga himuong Baywalk aron pagdani sa mga lokal ug mga langyaw’ng turista nga makasuroy sa maong lugar.

Midugang si Gullas nga nahinayhinay ang paghuman sa maong proyekto tungod kay gilantaw pa niya ang uban pang angayang idugang sa pagpatahom niini.

Alang kang Gullas pabor kaayo ang tanang mga negosyante og isda nga anha motumod sa ilang isda ug anha usab mangompra sa maong fish port tungod kay duol kaayo kini sa karsada sa South Road Property.