Comelec control ngadto’s bukid gisupak ni Mike

Dakong supak si Bise Mayor Michael Rama sa Bando Osmeña Pundok Kauswagan (BOPK) sa tinguha sa pundok oposisyon Tribu Guardo nga ipaubos sa Comelec Control ang mga barangay sa bukirang bahin sa dakbayan sa Sugbu sa umaabot eleksiyon karong Mayo 14.

Si Rama nga nagpasubli sa pagka bise mayor sa umaabot eleksiyon ubos sa BOPK party ni Mayor Tomas Osmeña nabalaka nga makahatag og negatibong epekto sa imahen sa dakbayan sa Sugbu kun mapa-ubos sa Comelec control ang mga bukirang barangay dinhi.

Kini tungod kay matud ni Rama nagpasabot na unya kini nga dili na kontrolado ang sitwasyon sa kahusay ug kalinaw sa dakbayan ug mapapas na ang pangalan sa siyudad nga gitawag karon og Queen City of the South.

Gawas niini mabakya na usab unya ang naangkon nga pasidungog sa siyudad nga maoy labing nindot nga puy-an sa mga langyaw ug lokal nga turista sa tanang mga siyudad dinhi sa Asya ug ingon man ang pasidungog nga Most Outstanding Council sa tanang mga siyudad dinhi sa nasud.

Giawhag ni Rama ang kampo ni congressional candidate Jonathan Guardo nga adto mosumbong sa kapolisan kun duna man kini mga armadong tawo nga nasigpatan nga naglibud-suroy karon sa mga bukirang barangay dinhi sa dakbayan ug dili kay morekomendar sa Comelec nga ipa-ubos sa Comelec control ang dakbayan.