Bombero gipusil nakaikyas

Usa ka sakop sa kabomberohan ang hingpit nga nakalingkawas sa pagpamusil sa gikainom niining lalaki sa miaging gabii sa Floremer Subdivision, Banilad, dakbayan sa Mandaue.

Ang gipusil mao si SFO2 Wenceslao Opene, 44 anyos, minyo nga taga Maria Luisa Village sa Banilad sa dakbayan sa Sugbu.

Si SPO2 Sandrey Torres nga gikahinabi sa Banat News miingon nga ang suspetsado nailhan nga mao si Ricardo Ocampo, hingkod ang panuigon nga taga Ouano Compound sa Banilad sa dakbayan sa Sugbu.

Matud pa niya nga usa ka Romeo Arceo, 35 anyos ug Mario Jerel Buquiron, 37 anyos, minyo ug nagpuyo sa maong dapit maoy miila sa suspetsado kinsa nakasaksi sa maong pagpamusil.

Dugang pa niya nga unang mipauli ang suspetsado gikan sa tindahan nga ilang giinoman apan mibalik kini nga nagdala na og hinagiban ug namusil.

Ang biktima nga dali nga nakaambak wala maigo samtang ang suspetsado daling miikyas pahilayo sa maong dapit.