Nerissa pakyas pagdani og mga negosyante

Pakyas si Kong. Nerissa Soon-Ruiz sa pagdani sa mga magpapatigayun nga mobutang sa ilang negosyo sa ikaunom nga distrito sa lalawigan sa Sugbu sulod sa pipila ka tuig niya sa iyang katungdanan.

Kini ang nakapaaghat kang Bokal Gabriel Luis "Luigi" Quisumbing sa pagpakigsakbang kang Ruiz sa pagka-kongresista sa eleksiyon karong Mayo 14.

Matud pa ni Quisumbing nga ang gihatagan og pagtagad ni Ruiz mao kadtong mga butang nga magamit sa pamolitika bisan dili makatabang sa pagpalambo sa ekonomiya.

Nunot niini, masaligon si Quisumbing nga gawas sa pamalaud sa Kongreso, iya usab mahatagan og pagtagad ang pagdani sa mga negosyante sa higayun nga mapili siyang kongresista sa ikaunom nga distrito.

Kini gumikan sa malampuson usab nga pagdumala sa ilang pamilya sa Norkis Group of Companies.

Gipasabot ni Quisumbing nga nikuyanap na ang pamatigayun sa ilang pamilya sulod na sa kapin sa 40 ka tuig sa wala pa mosulod sa politika ang ilang pamilya.

Matud pa ni Quisumbing nga ang iyang apohan nga si Norberto Jr. ang nagtinguha nga mawagtang na ang tradisyonal nga pamaagi sa pamolitika.

Gani si Norberto Jr. motago sa gawas sa nasud panahon sa eleksiyon aron makalikay sa mga politiko nga mangayo og tabang kaniya.

Nagpasalamat si Luigi sa iyang apohan nga niining iyang pagsulod sa politika, wala siya pasagdi sa ilang pamilya aron lang matuman ang damgo sa iyang apohan.