Petisyon batok sa usa ka kandidato sa Mandaue gitubag na

Gitubag sa kandidato pagkamayor sa Mandaue nga si Edgar Jon Cortes ang petisyon batok kaniya diha sa buhatan sa Commision on Elections (Comelec) sa rehiyon nga gisang-at ni Jonas Cortes, kandidato pagka-mayor sa Mandaue.

Si Atty. Lionel Castillano sa legal office sa Comelec 7 nga gikahinabi sa Banat News miingon nga napakyas sa pagsumiter sa ilang buhatan sa iyang pagtubag ang laing mayoralty aspirant nga si Lolita Ouano.

Samtang si Thadeo Jovito "Jonkie" Ouano mao usab ang misang-at og petisyon sa kandidatura ni Lolita Ouano sa katarungan nga wala kini makinarya alang sa pagpangampanya.

Si Atty. Castillano nga gihinabi sa Banat News miingon nga ang tanang ebidensiya ug mga dokumento nga isumitir sa maong mga kandidato nga gireklamo ilang ipadala sa Comelec Manila.

Dugang pa niya nga adto na sa ulohan nilang buhatan ang pagpakanaog sa hukom kun dawaton ba ang reklamo o dili alang sa pagdeklarar nga panglawgaw lang ang mga kandidatura niini.

Gipasabot niya nga kun mapakanaog ang hukom sa ulohan nilang buhatan ang pag-disqualify sa mga kandidato mahimo kining ipatuman.

Si Castillano miingon kun ikadeklarar ang maong mga kandidato nga wala makakuha sa hustong hukom maoy ilang buhaton ang pagsang-at sa motion for reconsideration.

Ang Comelec en banc sa ulohan nilang buhatan mao ang katapusan mopakanaug og hukom sa maong reklamo.