Mantawi Festival mahinayon

Mahinayon ang pagpasiugda og Mantawi Festival sa dakbayan sa Mandaue karong tuiga bisan pa man sa pagka- suspenso ni Mayor Thadeo Ouano.

Si kanhi Konsehal Alfonso Albaño nga maoy executive director sa Mantawi Foundation Inc. maoy mipadayag niini niadtong miaging adlaw.

Si Konsehal Albano miingon ang maong kulturanhong kalihokan sa dakbayan nga gikatakdang ipahigayon sa Mayo 5 kun tulo ka adlaw sa dili pa ang kapistahan sa Mayo 8 karong tuiga.

Gahinan kini og salapi sa dakbayan nga mokabat sa P4 milyones nga maoy kuhaan sa ganting salapi sa mananaog nga contingent nga P100,000 alang sa unang ganti ug P50,000 sa ikaduha ug ikatulong mananaug.

Matud pa ni Albaño nga masaligon siya nga mapagawas ang maong kantidad alang sa maong kalihokan karong tuiga nga iyang gisugdan sa paghan-ay niadtong konsehal pa siya sa dakbayan.

Kahinumdoman nga ang Mantawi Festival unang gipahigayon atol sa Charter Day celebration ug nahimo na nga nalakip sa mga nag-unang dakong kalihokan sa tinuig nga pangilin ni Senyor San Jose nga maoy patron sa dakbayan.

Gitataw ni Albaño nga ang mga contingent nga gikan sa kabarangayan sa dakbayan maoy moapil niini apan bukas gihapon alang sa mga contingent nga gikan sa ubang kalungsoran.

Si Albaño miingon nga dako ilang pagtuo nga dili makaapil ang mga contingent gikan sa ubang kalungsoran sanglit sagad sa mga lokal executive busy karon sa ilang pagpangampanya.