Gibanabanang mokapin sa usa ka libo ka mga tawo ang nitambong sa maong political rally sa oposisyon nga gipahigayon sa usa ka bakanteng luna sa Sityo Kana-as sakop sa barangay Guadalupe niadtong Domingo sa gabii.
Apil sa nitambong sa maong rally mao si kagawad Ruben Baculi sa Guadalupe ingon man ang mga kandidato pagka-konsehal sa Tribu Guardo ug si Jonathan Guardo, kandidato pagka-kongresista atbang ni Rep. Antonio Cuenco.
Atol sa pagpamulong ni delos Santos gipasalig niini nga andam siyang moserbisyo sa mga molupyo sa dakbayan nga walay pagpinig kon ugaling modaog sa umaabot piniliay.
Gihimong sanglitanan ni delos Santos ang barangay Lahug diin siya maoy kasamtangang barangay kapitan nga nilambo og maayo bisan paman og wala kini magsalig sa mga ayuda gikan sa dakbayan.
Samtang nagpahigayon og political rally sa Guadalupe ang Tribu Guardo gisulong sab sa BOPK pinangulohan nila ni Mayor Osmeña, Bise Mayor Michael Rama, Kongresista Antonio Cuenco ug mga konsehal ang barangay Pasil diin usa ka pulong-pulong ang ilang gipahigayon sa maong lugar niadtong tungura.
Nasayran nga ang kapitan sa barangay Pasil, Romeo Ocarol wala na mosuporta ni Cong. Cuenco ug mitapon ngadto ni Guardo pagka -Kongresista.
Karung petsa 22 niining bulana ang BOPK pinangulohan ni Osmeña mao na usay mosulong og adto mangampanya sa balwarte ni delos Santos didto sa barangay Lahug.