Akbayan ipa-DQ sa Babae party list

Naglaraw ang partylist group nga Babae para sa Kaunlaran (Babae Ka) sa pagpa-disqualify sa laing partido nga Akbayan Citizen's Action Party (Akbayan) human mipagawas sa pangalan sa mga nominado sa nagkalainlaing party-list organizations nga kalapasan sa balaud.

Matud pa ni Sally Dagami, Babaye Ka chairperson, nga tataw kaayo ang mga ebidensiya nga nahipos sa nagkalainlaing radyo, telebisyon ug mga pamantalaan nga dili mahimong ihimakak sa Akbayan.

Ang Commission on Elections mismo ang miluwat og bahad nga ipa-disqualify kadtong mga party-list groups nga mopagawas sa pangalan sa mga nominado sa eleksiyon karong Mayo 14, 2007 ubos sa party-list system.

Matud pa ni Comelec Commissioner Resurreccion Borra nga makapalibog sa mga botante ang pagpagawas sa pangalan sa nominado sanglit pangalan man sa partido ang ilang isulat sa balota.

Ang presidente sa BABAE KA, Ruth Vasquez, nagkanayon nga malisyoso kaayo ang gihimo sa Akbayan ug gigamit lang ang media aron pagpaila sa ilang grupo.

Gipahibawo ni Vasquez ang ilang planong pagsang-at og petisyon ngadto sa Comelec batok sa Akbayan dungan ang panawagan sa ubang partylist groups nga moduso usab sa ilang petisyon sa pagpa-disqualify sa Akbayan.