Batan-on gipusil sa Akrho

Usa ka batan-on lalaki ang gipusil sa mga sakop sa Alpha Kappa Rho sa nakalabay'ng Biyernes Santo human mobisita sa buhing kalbaryo nga nahimutang sa Poblacion, Carmen, Cebu.

Samdan sa tuong dapi-dapi agi sa wala matinong kalibre sa armas ang biktimang si Merlon Serseva, 21, residente sa Cogon West sa sama nga lungsod.

Ang gitumbok nga mipusil sa biktima nailhan sa kapolisan nga si Ronel Muaña, 18, residente sa Poblacion ug Jobet, 17, lumad nga taga San Bartolome, Bogo, Cebu ug kasamtangan nagtrabaho sa poultry sa mga Lhuillier sa maong lungsod.

Sa inisyal nga imbestigasyon sa kapolisan nasayran ang biktima gikan sa buhing kalbaryo naglakaw paingon na mopauli sa ilang pinuy-anan apan kalit kining gipusil sa gikatahapan.

Daling gidala ang biktima sa Vicente Sotto Memorial Medical Center. Si Muaña misibat samtang si Jobet nadakpan.