20 ka kaso pag-abuso sa kababayen-an natala sulod sa first quarter

Sobra sa 20 ka insidente sa pagpangabuso sa mga babaye ang natala sa talaan sa Women and Children’s Desk sa kapolisan sa Talisay sulod sa unang quarter niining tuiga diin ang mga suspetsado kaugalingon nilang mga bana.

Gibutyag ni PO3 Marginette Yosores kagahapon sa mga tigbalita nga ang mga biktima miduso na og kaso batok sa ilang mga bana tungod kay wala na kini makaagwanta sa pagpangabuso.

Duha sa nalambigit sa kalapasan sa Akta Republika 9262 kun "Act Against Women and their Children" ang Norwegian ug American national nga si Eilif Ullebo, 62 ug Bruce Robert Bilton, 50-anyos.

Matud ni Yosores nga ang maong mga langyaw miabuso sa ilang mga Filipina nga asawa physically, psychologically ug financially.

Ang physical buot pasabot nga ang maong mga suspetsado mamun-og sa ilang mga asawa, psychological buot pasabot mobuhi kini og mga sakit nga pulong ug ang financial dili kini mohatag og suportang pinansiyal ngadto sa ilang asawa ug mga anak.

Ning bag-uhay lang, usa ka Letecia Condar, 32-anyos, ang mipasaka og reklamo batok sa iyang bana nga si Joseph Condar, 34, kinsa miabandonar kaniya ug sa ilang duha ka anak.

Base sa imbestigasyon ni Yosores nga si Letecia mipasangil nga gibun-og sa iyang bana ug wala na kini hatagi og pinansiyal nga suporta.

Niadtong Enero 22 niining tuiga nahibaw-an na lang ni Letecia nga si Joseph aduna nay laing kapuyo diin atua kini manimuyo sa Barangay Tandayag, Amlan, Negros Oriental.