Mas mahal ang police clearance sa Talisay

Mga Talisaynon mireklamo sa taas nga presyo nga ilang bayaran kung mokuha sila og police clearance.

Matud pa sa mga mireklamo kinsa nagdumili sa pagbutyag sa ilang mga ngalan nga mas ubos ang ilang bayaran kung mokuha sila og clearance sa National Bureau of Investigation (NBI) diin P115 lang ang ilang bayran.

Usa sa mga mireklamo mibutyag nga gipabayad siya og P160 sa pagkuha niya og police clearance apan ang gibutang sa iyang resibo P105 lang.

Si Police Superintendent Romeo Perigo, hepe sa kapolisan sa dakbayan mipasabot nga ang bayranan sa mokuha og police clearance haom lang kini para sa epektibo ug dali nga serbisyo.

Matud ni Perigo nga kung gusto og baratong bayranan ang mga mokuha og police clearance mobalik sila sa manual nga sistema.

Kaniadto ang mga mokuha og police clearance kinahanglan pa kini og usa ka adlaw para sa pag-proseso ug sa sunod adlaw pa nila makuha ang ilang police clearance.

Apan karon maghuwat na lang sila og 30 minutos ug makuha na dayon ang nahisgutang police clearance sa mo-request niini.

Ang dakbayan mikuha og software gikan sa usa ka pribadong kompaniya para maoy mopahigayon sa trabaho kabahin sa pagproseso sa police clearance.

Si Perigo mihagit sa mga mireklamo nga ipakita ngadto sa city hall ang ilang mga resibo kung aduna kini reklamo kabahin sa sistema karon.

Si Maridel Abapo usa ka staff sa nahisgutang kompaniya nagkanayon nga ang police clearance nga gamiton para local ug abroad nagkantidad kini og P120 ug 200.

Ang nahisgutang presyo naglangkob na kini sa P10 nga official receipt ug P20 nga document stamp nga gi-provide sa City Treasurer’s Office apan wala kini labot sa cedula diin ang aplikante anha mokuha sa city hall.

Si Abapo midungag nga mohatag gyud sila og resibo ngadto sa mga gibayaran sa mga aplikante.