Kawat sumpoon sa kandidatos' oposisyon

Pagsumpo sa "simpleng" kawat sa mga butang sa gobyerno ang usa sa mga gipanghingusgan sa usa ka kandidato sa oposisyon sa dakbayan sa Talisay.

Si Ulyses "Yul" Julia, usa ka negosyante ug ika-onse sa ranking sa konsehal sa miaging piniliay nagkanayon nga wala kini makita sa mga namuno sa City Hall karon.

Matud ni Julia nga usa ka negosyante og scrap material, iyang pandayon ang usa ka balaod nga naghatag og ngipon sa "anti-fencing" o ang pag-criminalize sa mga mamamalit og kinawat ilabina kun kini butang sa gobyerno.

Si Julia, nga gitawag usab sa sangod nga "Idol" sa mga kaila niyang mga laborers, nagkanayon nga adlaw-adlaw halos adunay krimen sa kawat sa mga "cable wires", suga o mga puthaw sa South Coastal Road.

"Maskin man gani ang tabon sa mga manhole, pangawaton na ug ipatimbang, ug gago sad kaayo ang modawat," matud ni Julia.

Siya nagkanayon nga yano ra kini kaayo ang iyang sugyot apan og itipon na ang mga kinawat nga mga butang nga dili makita sa mga nagdumala sa City Hall, moabot na kini og linibolibo o di kaha milyon-milyon.

Matud ni Julia, gi-seminar niyang daan ang iyang mga empleyado sa scrap shop nga sutaon og maayo kun diin ang source sa mga scrap nga gipatimbang.

Siya nagtuo nga daghan unya ang dili mouyon niini apan makatabang na kini labi na sa mga batan-on nga gituohan nga mao kasagaran ang mga suspetsado sa mga kawat.

Diriyot na unta nga ma konsehal sa 2004 elections si Julia tungod kay gamay lang ang ilang ligas ni Konsehal Serrie Restauro.

Si Julia midagan sa line-up nila ni LAKAS-CMD Gabriel Leyson ug Lani Abarquez nga magpapili isip mayor ug bise mayor sa dakbayan.

Gitan-aw sa maong grupo sa nagkahiusang oposisyon, nga dili kabintahaan ang ilang grupo ug init kaayo ang pagdawat sa mga tawo maskin asa sila paingon.

Uban sa ilang line-up sa oposisyon mao sila incumbent councilors Alan Bucao, Emil Go, ug Iñake Jordana.

Kauban usab nila ni Julia si Tronan Lastimosa;anak sa retiradong pulis; Gerson Lacida,konsehal sa Lawaan; Tina Jordana, igsoong dentista ni Konsehal Jordana;Anthony "Jojo" Bacaltos, igsoon ni Bokal Raul Bacaltos ug kanhi Mayor Dehlia Tiu; Cansojong barangay captain Nick Hermosa ug ang igsuon ni George Aznar, si Ricky Aznar.

Gituboy mismo ni former governor Lito Osmeña, gubernatorial candidate Antonio Yapha ug vice-gubernatorial candidate Clavel Asas-Martinez ang maong grupo sa primerong gabii sa kampanya.