Katabang gikamang sa duha ka lalaki

Usa ka katabang ang gikamang sa duha ka mga lalaki samtang natulog sa iyang lawak diha sa barangay Guadalupe ning dakbayan niadtong milabay'ng gabii.

Ang biktima nga 30 anyos na ang pangidaron lumad nga taga Tabuelan ug kasamtangang nagpuyo diha sa iyang agalon sa nahisgutang barangay.

Duha ka mga suspek ang gidakop ug giilang sila si Epher Lobino,19, nagpuyo sa dalan Panganiban ug Allan Ignacio, 20, nagpuyo usab sa Camputhaw ug parehong mga lumad nga taga Tayasan sa Negros Oriental.

Sumala pa sa biktima ngadto sa kapolisan sa Guadalupe kasamtangan siyang nag-inusarang natulog sa iyang lawak dihang misulod ang mga suspek ug dali siyang gilayog.

Ang usa gikatahong milayog kaniya ug misampong sa iyang baba aron di siya makasinggit samtang ang usa maoy daling mihubo sa iyang sapot ug panty.

Bisan paman niini naninguha ang biktima nga makasukol apan wala siyay dag-anan sa duha ug milampos gyud sila sa ilang dautang tinguha.

Matud pang SPO4 Edison Torres, ang desk officer sa Guadalupe police station nadakpan dayon ang duha human mitug-an ang biktima sa nahitabo kaniya.

Samtang sa laing bahin, usa ka William Encabo nga taga Purok 8 sa Camputhaw ang gidakop sa Theft and Robbery Section pinasikad sa warrant of arrest tungod sa kasong rape.

Ang midakop kaniya mao ang grupo ni Inspector Michael Anthony Bastes, deputy chief sa TRS niadtong Miyerkules sa hapon pinasikad sa warrant of arrest nga giluwatan ni RTC branch 24 judge, Olegario Sarmiento, Jr.

Matud pang Bastes nga usa ka 5 anyos nga batang babaye maoy gilugos sa suspek ug natultulan si Encabo diha na sa Perrelos, Carcar hinungdan nga ila kining gisikop.