Buko-buko sa tres anyos nababha sa pugakhang

Patay ang usa ka tres anyos nga bata human kini mapusili sa likod sa iya rang lolo nga giingong hubog diha sa barangay Taloot sa Argao niadtong milabay'ng Biyernes sa gabii.

Ang namatay giilang si Kerstine Bontilao, residente sa maong dapit kinsa gidala pa ngadto sa duha ka tambalanan lakip na dinhi sa Sugbu apan dangtan pila ka oras nakabsan gyud kini sa kinabuhi.

Ang suspek nga iyang apuhan giilang si Placido Medrano, Sr., 71 anyos, residente sa maong lugar kinsa gikatahong hubog niadtong tungora.

Matud pa ni SPO1 Eduardo Semilla sa Argao police station nga kuyog sa biktima ang ubang mga apo sa suspek ug ilang mga uyoan nga nagtapok diha sa panimalay niini.

Samtang nanan-aw og telebisyon gikatahong miabot ang suspek nga nagpunay og bagulbol ug dangtan pila ka gutlo milakaw kini ug sa pagbalik nagdala na og pugakhang.

Gikatahong diha pa sa atubangan sa mga bata nagbutang og bala ang suspek ug diha-diha kalit kining mibuto tumong sa likod ni Kerstine, ang bata daling gidala sa Deiparene Hospital sa Sibonga ug gibalhin sa usa ka tambalanan sa Sugbu apan namatay gyud kini.

Ang suspek daling gidakop nila ni SPO1 Esteban Albuera ug kasamtangan na karong gitanggong ug gikatakdang pasakaan og kasong parricide ugmang adlawa.