Usa patay laing duha nangaangol

Usa ang namatay ug duha ang nangaangol human ang giluwanan nilang motorsiklo nabangga sa gutter niadtong Lunes sa buntag didto sa Sitio Canmanoc, Villahermosa Tudela Cebu.

Si Perfecto Baring namatay pag-abot sa tambalanan sa San Francisco District Hospital human makahiagum og daghang samad ug bun-og sa kalawasan lakip sa ulo samtang ang laing naangol giila sa kapolisan sa Tudela nga mao si Ronnie Ybañez, hingkod ug Raymund Cumilang ang tulo lumolupyo sa Villahermosa sa maong lungsod.

Base sa taho sa kapolisan sa Tudela nagbutyag ang namatay maoy nagmaneho sa motorsiklo ug ang duha nag-angkas.

Sa pasiunang imbestigasyon ni PO3 Ismael Florentino ang tulo gikan sa Puertobelo sa maong lungsod subay sa provincial road pag-abot sa nahitaboan kalit lang nawad-an sa control si Baring sa gimaneho niining motorsiklo ug nibangga sa gutter.

Ang tulo ka mga biktima nangalagpot sa sementadong dalan hinungdan nga gidali sila pagdala sa District Hospital apan si Baring ang gidiklarar nga patay nang naabot.

Si Ybañez ug Cumilang pipila ka gutlo ang nakalabay ang gibalhin sa tambalanan sa dakbayan sa Sugbu gumikan sa seryosong naangkon niining mga samad sa kalawasan.