Gibunala'g guod, gidunggab namatay

Patay ang usa ka lalaki nga nagsakay sa motorsiklo dihang gibunalan og ‘guod’ nga kawayan ug pagkahuman gidunggab sa makadaghang higayon nga miresulta sa kamatayon.

Nahitabo kini pasado alas 7 sa miaging gabii sa Magkagong, usa ka bukirang bahin mga 8 kilometro ang gilay-on gikan sa Poblacion sa Sibonga.

Gideklarar sa mga doktor sa Carcar District Hospital nga patay na nga nahidangat ang biktimang si Nelson Genobaga Diaz, 26, ug residente sa Lamakan sa samang lungsod.

Ang gitumbok nga mibunal ug midunggab sa biktima giila sa kapolisan nga mao si Joy Abella, hingkod ug nagpuyo sa lungsod sa Argao.

Si Diaz nakaangkon og dakong samad sa agtang agi sa pagbunal sa suspek ug kawayan ug nagkadaiyang samad sa kalawasan.

Base sa taho sa kapolisan ang biktima sakay sa motorsiklo gikan sa iyang higala sa Magkagong ug paingon na kining mopauli sa ilang pinuy-anan sa Lamakan.

Apan pag-abot sa nahitaboan kalit lang mibabag sa kalsada ang suspek nga nagbitbit og kawayan ug sa walay igong rason gihapsan sa agtang ang biktima.

Daling gihatud ang biktima sa nahisgutang tambalanan apan wala na makaabot pang buhi sanglit patay na kining daan.

Ang suspek human sa hitabo daling nakasibat palayo sa lugar ug wala na igkita sa mga niresponding kapolisan didto sa crime scene.

"Gikan ni sa iyang amigo (biktima) ubos raman nang ilaha, nagkalalis kuno ni sila niadtong pipila ka adlaw ang nakalabay basin mao ni ang motibo", asoy ni PO2 Antonio Sanchez sa Banat News.

Matud ni Sanchez ang suspek nagtrabaho isip caretaker sa usa ka poultry farm duol sa nahitaboan.

Kasong murder ang gipasaka sa kapolisan kagahapon batok sa gikatahapan.