‘Work related’ ang pagpatay sa CITOM – Tancinco

Dunay lig-ong ebidensya nga magpamatuod nga may kalambigitan sa iyang trabaho ang motibo sa pagpusil patay sa usa ka sakop sa City Traffic Operation Management (CITOM) nga si Romeo Muñez, 38 anyos, didto sa A.C. Cortes Avenue dakbayan sa Mandaue kagahapon sa buntag.

Matud ni Citom Executive Director Arnel Tancinco nipadala og duha ka traffic investigator sa siyudad sa Mandaue aron motabang sa imbestigasyon sa kaso.

Matud ni Tancinco dunay lig-ong ebidensya nga magtumbok nga may kalambigitan sa trabaho ang motibo gumikan kay walay kontra ang biktima.

Si Muñez nadestino sa Task Force Franchise nga gihulagway ni Tancinco nga aktibo kaayo sa pagpanakop sa mga sakyanan nga nigamit og mga peke nga prangkisa.

Gani matud ni Tancinco nga apil sa mga naligsan ni Muñez mao ang mga PUJ drayber sa Mandaue nga rota gumikan sa mga kalapasan niining nahimo sa lagda sa trapiko.

Hinoon si Mayor Tomas Osmeña nipasalig na nga mohatag og burial assistance sa pamilya sa biktima ug gipatun-an usab karun ang posibleng paghatag og trabaho sa asawa niini ug ang paghimong scholar sa mga anak aron makatiwas pagtungha.

Si Osmeña nihatag og P10 mil nga hinabang pinansiyal sa pamilyang Muñez wala pay labot sa uban pang mga pinansiyal nga donasyon gikan sa pribadong sektor.