CSC may warning sa mga kawani

Gipasidan-an sa Civil Service Commission (CSC-7) ang tanang mga opisyal ug kawani sa gobyerno nga dili mag-apil-apil sa kalihukan ilabi na sa pagpangampanya sa nagsingabot nga eleksyon karung bulan sa Mayo.

Gibutyag ni CSC-7 assistant regional director Edith Lozano nga gitakda silang mopagawas og direktiba aron magpahimangno sa tanang mga kawani sa gobyerno nga gidili ang pag-apil-apil sa mga kalihukan sa umaabot piniliay.

Matud ni Lozano kasong administratiba ang mamahimong atubangon sa nahisgutang mga kawani sa gobyerno nga masakpang moapil sa kalihukan sa politika ug mag-atubang og silot nga pagkataktak sa ilang tagsatagsa ka mga katungdanan.

Gitakdang mopagawas og direktiba ang CSC nga magpahimangno sa maong mga kawani sa gobyerno ilabi na gyud niadtong mga appointed officials.

Samtang giklaro ni Comelec assistant regional director Lionel Marco Castiliano nga wala gyuy bisan si kinsa nga kawani sa gobyerno ang gitugotan nga mag-apil-apil sa kalihukan sa politika.

Giangkon niya nga ang lagda nga ilang gibasehan pagdili sa mga kawani sa gobyerno pag-apil sa politika gipasubay usab sa balaod sa Civil Service.

Si Cebu Provincial election supervisor Edwin Cadungog miingon nga ubos sa gipagawas nga resolusyon sa Comelec gitugtan niini kadtong mga barangay opisyal alang sa ilang pagpangampanya kun makaduso og leave of absence sa ilang buhatan.

Giklaro usab niini nga kun ang usa ka barangay opisyal mogamit sa mga sakyanan sa barangay alang sa ilang pagpangampanya mamahimo kining kasohan isip election offense gumikan kay ang mga sakyanan mamahimo lang gamiton kun adunay mga emerhensya ingon man paghatod sa mga basic services ngadto sa ilang matag konstituwente.