Babaye nagkugos og bata nanulis

Babayeng lending collector gitulis sa usa ka babaye nga nagkugos og masuso nga bata samtang luwan sa usa ka traysikad didto sa Juan Luna corner Highway Looc, Danao sa milabay’ng gabii.

Ang biktima mao si Anna Lou Peras Donayre, 24, lumad sa Sitio Kamalig Bato, Tabok, Danao ug nagtrabaho isip program assistant sa TSKI Lending Corp.

Base sa pamahayag ni Donayre atubangan ni SPO4 Teofilo Deguilmo sa Danao Police Station nasayran nga gikan siyang naningil sa ilang mga kliyente.

Sa dihang misakay na kini sa usa ka traysikad padulong sa iyang trabahoan adunay usa ka babaye nga nagdala og bata mipara sa iyang gisakyang traysikad.

Samtang nagdagan ang traysikad, ang babayeng nagdala og bata kalit nga mibunot og kutsilyo dayong deklarar nga "tulis" ngadto sa biktima hinungdan nga iya na lang nahatag ang bag nga adunay sulod nga kwarta.

Nakuha gikan sa biktima mao ang iyang koleksiyon nga mobalor og P12,320, iyang personal nga kuwarta nga balor P1,100 ug ang cellphone niini nga model 6610-I.

Gumikan sa kahadlok ni Donayre mikalit kini og kanaug sa traysikad nga wala gani makasinggit og panabang bisan na lang sa drayber sa maong traysikad.

Midangop sa kapolisan sa Danao si Donayre.

Sa pagresponde sa kapolisan, wala na nila maabti sa lugar nga nahitaboan ang nanulis nga babayeng nagkugos og masuso ug padayon gihapon ang ilang pagpangita niini.