Police tips karong bakasyon

Mga angayang buhaton aron masiguro ang kaluwasan sa imong balay gikan sa mga kawatan ug sunog kung mobakasyon karong panahuna sumala pa sa Theft and Robbery Section.

1. Siguroha nga naka-lock ang pultahan, bintana ug gate, ilabi na kadtong mga bintanang walay mga iron grills.

2. Pahinumdomi ang katabang nga mahibilin nga dili mopasulod og mga tawong wala sila makaila.

3. Pahinumdomi usab ang mga mabilin sa balay nga dili basta mo-entertain sa tawag sa telepono nga momando kanila pagpagawas og salapi, mga butang kung walay kumpirmasyon gikan sa agalon.

4. Ang tagbalay angayang mopahibalo daan sa mga mabilin sa balay katabang man o kabanay kung duna silay gipaabot nga tawo o bisita samtang sila nagbakasyon.

5. Ang mga mahalong butang, alahas ug importanteng dokumentos ibutang sa luwas nga dapit sa balay.

6. Kung mahimo, pahibaw-on ang silingan nga sila mobakasyon ug tawgan sila sa telepono aron mangumusta sa ilang balay.

7. Magbutang og paskin nga "Beware of Dogs," ug uban pang paskin diha sa gate nga makapahadlok sa mga nagplanong mosulod o ba kaha mangawat.

8. Kung walay mahibilin sa balay, ibta ang tanang linya sa kuryente o ba kaha plangka ilabi na kung molanat og pila ka adlaw ang bakasyon aron malikay sa sunog.

9. Ayaw pagdala og mahalong mga butang, gadgets sama sa cellphone, videocams ingon man dakong kantidad nga cash kung mobiyahe aron dili daling makakuha sa atensyon sa mga tulisan ug isnatser, ayaw og dalig salig sa imong katupad nga pasahero sa bus,barko ug PUJ, basin tulisan kini o mangunguot.

10. Paninguhaa nga duna kay numero sa police hotlines o ba kaha text-a-crime police hotline sa lugar nga imong bakasyonan.

Kini pipila lamang sa mga pahinumdom nga angayang bantayan sa mga bakasyunista sumala pang TRS chief, Sr.Inspector Alexis Relado.