Pang-haras sa goons ni Guardo gi-monitor

Dugang mga sakop sa kapolisan ug mga sakyanan gipadala sa kagamhanan sa siyudad sa Sugbu ngadto sa mga bukirang barangay dinhi sa dakbayan aron mapalig-on ang seguridad sa maong lugar ug malikayan ang posibleng motumaw nga kagubot nunot niining nagsingabot nga eleksyon sa Mayo.

Gibutyag ni Konsehal Augustus Pe Jr. gikan sa 34 ka polis nga nadestino sa bukid gipun-an nila kini kagahapon ug nahimo na karong 50 ka polis nga maoy gibahin sa 13 ka mga outpost sa mga bukirang barangay sa south ug north district.

Gawas niini, gipadalhan usab sa Cebu City Police Office (CCPO) og upat ka Nissan terrano patrol car ang maong lugar nga motutuk sa pagmonitor sa kahusay ug kalinaw sa barangay Buot-Taup, Sinsin, Sudlon-I ug Sudlon-2.

Niadtong milabay'ng mga semana, ang kapitan sa Sudlon-I Dante Tabucal mipublikar sa mga armadong tawo niining nasigpatan nga nagsuroysuroy sa bukid nga gituohan nilang mga "goons" ni Jonathan Guardo, kandidato pagka kongresista sa south district atbang ni Kongresista Antonio Cuenco.

Samtang karong bag-o ang grupo na usab ni Guardo ang nireklamo nga gi-harass ang ig-agaw niining si Ariel Guardo ug gitionan og armas dihang mibisita sa ilang mga lider sa maong lugar.

Gipasabot ni Pe nga dili pa sila makahimo og pormal nga imbistigasyon sa maong reklamo hangtod nga moduso og pormal nga reklamo ang kampo ni Guardo.

Apan gipasalig sa konsehal nga mahunong na ang maong mga gikatahong kagubot sa maong lugar pinaagi sa pagpalig-on sa presensya sa dugang mga polis nga gidestino sa bukid ug sa mga checkpoints nga himuon.