Joy, Coping, Gabby pasidunggan sa konseho; may hulip na

Pasidunggan sa konseho sa siyudad sa Sugbu ang tulo nila ka mga kaubanang konsehal nga mapupos na ang ikatulo ug katapusang termino human sa eleksiyon karung Mayo.

Gibutyag ni Bise Mayor Michael Rama, presiding officer sa konseho nga ang tulo ka mga kauban nilang konsehal nga makadawat sa maong pasidungog gilangkuban kini nila ni Majority Floor Leader Jocelyn Pesquera, konsehal Procopio "Coping" Fernandez ug Gabriel Leyson.

Si Pesquera ug Fernandez sa south district anaa na sa ikatulo ug katapusang termino u g samtang si Leyson sa north district duna pa untay nahabiling usa ka termino apan misang-at kini sa iyang kandidatura pagka -mayor sa siyudad sa Talisay atbang ni Mayor Socrates Fernandez hinungdan nga gihulipan sa BOPK.

Matud ni Rama ipahigayon ang pagpasidungog nila ni Pesquera, Fernandez ug Leyson atol sa sesyon sa konseho karung Miyerkules.

Si Pesquera maoy kasamtangang majority floor leader ug chairman sa committee on education, si Fernandez maoy chairman sa committee on police fire and penology ug si Leyson maoy chairman sa committee on infrastracture ug local and foreign funded project.

Gihulagway sa bise mayor nga dako kaayo og natampo sa konseho ang maong tulo ka konsehal hinungdan nga ang konseho sa dakbayan maoy nakadaog sa pasidungog dili pa lang dugay as Most Outstanding Highly Urbanized City sa tibuok nasud nga gipasiugdahan sa Metrobank Foundation Incorporated.

Ang hulip sa tulo ka mga konsehal sa line-up sa BOPK alang sa eleksyon karong Mayo mao sila si Basak Pardo barangay captain Roberto Cabarrubias ug Ritchi Osmeña, pag-umangkon ni Mayor Tomas Osmeña ug Banilad barangay captain Leah Japson pagka-konsehal sa norte hulip ni Leyson.