Bantayan, La Libertad 'AOC' sa PRO-7

Gipailawom na sa Police Regional Office 7 ug Commission on Elections ang Bantayan Island ug lungsod sa La Libertad, Negros Oriental nga "areas of concern" nunot sa mga bayolenteng insidente nga may kalambigitan sa eleksyon.

Si Chief Supt. Silverio Alarcio,Jr. director sa PRO-7 sa pakighinabi sa mga tigbalita kagahapon nagkanayon nga ang maong mga dapit butangan na og dugang mga polis.

Ang usa ka lugar nga tawgon og "areas of concern" gibase sa kasaysayan na sa maong lugar nga duna nay panghitabo sa mga nangaging eleksyon, dunay higpit nga panagribal sa mga kandidato, presensya sa mga goons ug ingon man mga rebelde

Sama sa Bantayan Island, duna nay nahitabong pagpatay niadtong miaging eleksyon diin usa ka hepe sa kapolisan ang gipatay samtang sa La Libertad ning bag-uhay lang dunay gibanhigang barangay kapitan nga miresulta sa kamatayon sa pito sa ka tawo.

Ang maong barangay kapitan gikatahong suporter sa usa sa mga kandidato sa maong dapit.

Sa gihimong imbestigasyon sa Criminal Investigation and Detection Group 7 migawas nga election related ang insidente ug dili ang nahaunang migawas nga report nga mga rebeldeng NPA ang mibanhig sa grupo.

'We have security plans, in fact we have sent some additional augmentation personnel sa Bantayan Island para maiwasan yung gulo duon," asoy pang Alarcio.

Samtang ang seguridad sa mga turista ug bakasyonista diha sa maong dapit gipasalig ni Alarcio nga dunay paigong pwersa nga gipadala nga mobantay kanila bisan na diha sa mga beach resorts.

Gisusi na usab sa kapolisan ang insidente sa Canlaon City kagahapon diin ang bodyguard ni Mayor Judith Cardenas nga si Feliciano Tajaron Lubresco kinsa gibanhigan niadtong milabay'ng adlaw sa buntag diha sa sitio Tukon-tukon,Linuthangan Canlaon City.

Matud pang Alarcio nga nakumpirmar na nilang dunay naglihok nga mga goons diha sa maong dapit nga magbayad aron mohimo og kasamok sa bisan kinsang tawo nga buot ipatrabaho kanila.

Si CIDG-7 deputy regional director, chief Inspector Jacob Macabali sa pakighinabi sa Banat News nagkanayon nga mohimo sila og parallel investigation sa maong hitabo sanglit duna nay mga nahitabo sa Canlaon City nga may kalambigitan ang eleksyon kaniadto.

Ang bana kaniadto ni Cardenas nga si Vice Mayor Jose Cardenas gibanhigan usab diha sa maong dakbayan. Si Alarcio nagkanayon nga ila nang gitun-an kung apilon ang Canlaon sa "areas of concern."