Kahera gipusdaka'g armas

Gitulis sa nagbinugtong nga armadong lalaki ang usa ka gasoline station sa dalan Plaridel, Alang-Alang, dakbayan sa Mandaue alas 3 pasado ang takna sa miaging kaadlawon.

Si SPO1 Ricardo Raagas, imbestigador sa Presinto 1 sa Centro Police Station miingon nga ang gitulis mao ang Caltex gasoline station ug mokabat sa P2,000 nga salapi ang nasakiyo niini.

Dugang pa niya nga si Joy Donor nga maoy cashier sa maong gasoline station miasoy kanila nga kalit lang gidakdak sa tulisan ang armas ug dungan ang pagdeklarar nga tulis.

Matud pa ni SPO1 Raagas nga nagkurog sa kahadlok ang cashier nga maoy hinungdan sa paghatag sa maong kantidad ngadto sa nagbinugtong nga tulisan.

Sumala sa asoy sa cashier nga didto sa sulod sa pansayan ang guwardiya dihang nahitabo ang maong pagpanulis.

Si SPO1 Raagas miingon nga human makuha ang salapi sa wala hiilhing tulisan nagdali usab sa pagbiya sa wala na usab masayri nga gidulngan.