Police, Fire ug prisohan sa Mandaue gialerto

Si Senior Superintendent Alexander Abadinas sa Mandaue City Police Office, Mandaue City Fire Marshall, Oscar Mayol sa Bureau of Fire Protection ug Chief Inspector Jose Moring sa Bureau of Jail Management and Penology sa Mandaue City Jail ang higpit karong mipaalerto sa ilang mga sakop.

Kini gitumong alang sa pagpatuman sa kasiguroan sa tagsa-tagsa nila ka mga kaakohan sa ilang buhatan aron kalikayan ang mga dautang panghitabo atol sa kalihokan sa Biyernes Santo ug kabanhawan nga magtapok ang daghang tawo sa mga simbahan.

Si Abadinas miingon nga lakip sa higpit nga iyang gipabantayan mao ang mga vital installation sa kagamhanan nga naglakip sa Marcelo Fernan Bridge, Mactan Mandaue Bridge, mga mall ug mga simbahan nga posible maoy target sa mga pundok nga mopasiugda og dautang kalihokan.

Si Mandaue City Fire Marshall Oscar Mayol sa Bureau of Fire Protection (BFP) miingon nga atol sa maong mga adlaw iyang giawhag ang katawhan sa pag-amping sa pagdagkot og kandila aron kalikayan ang katalagman sa sunog samtang hugot nga bantay usab sa mga prisohan atol sa Semana Santa.