Nagpailang "CIDG" nanakmit og DVD

Duha ka wala mailhing lalaki kinsa nagpailang mga polis ug mga sakop sa Criminal Intelligence and Detection Group (CIDG)-7 ang nanakmit og DVD laptop player nga nagkantidad og P10 mil gikan sa usa ka negosyante og mga CD ug DVD tape diha sa Barangay Tabunok dakbayan sa Talisay.

Ang nahisgutang insidente nahitabo sa milabay'ng semana apan niadtong Biyernes sa alas 5:00 sa hapon lang kini gikataho sa biktima sa kapolisan diha sa Barangay Poblacion.

Ang biktima giila sa mga polis nga si Danilo Olalo, 32-anyos taga Barangay Quiot, Pardo niining dakbayan.

Base sa imbestigasyon sa mga polis sa siyudad nga samtang nag-atiman si Olalo sa iyang mga baligya kalit lang nga mitungha ang nahisgutang mga lalaki kinsa pulos adunay mga patik sa kamot nga letrang "GV".

Ang duha nagpaila ngadto ni Olalo nga mga polis ug sakop sa CIDG-7 dayon sakmit sa nahisgutang butang sa walay igong rason.

Human og kuha sa mga suspetsado sa butang dali kining misakay sa usa ka color puwa nga Kawasaki nga motorsiklo nga walay plaka ug mipadagan pahilayo sa lugar paingon sa dakbayan sa Sugbu.

Ang kapolisan mipahigayon og follow-up sa maong insidente.