Ang gihatagan og pasidungog ug medalya mao sila si PO2 Vilma, PO2 Antonio Din ug PO2 Vilma Degamo human sila parehong nakatuman sa ilang trabaho batok mga tulisan.
Si Degamo nga maoy close-in security ni Gobernador Gwendolyn Garcia ug sakop sa Cebu Provincial Police Office midakop kang Ronilo Bastatas niadtong Marso 9 sa hapon diha sa Carreta.
Si Bastatas ug laing kaubang nakaikyas mitulis kang Degamo diha atubangan sa usa ka dakong department store sa North Reclamation Area diin ilang gituok ug gitiunan og kutsilyo sa liog ang maong polis dayong mikuha sa clutchbag niini nga maoy gisudlan sa iyang kwarta ug armas.
Apan si Degamo wala mawad-i sa iyang kursunada ug migukod sa duha bisan wala nay armas ug nagsuot og high-heel nga sapatos nga sa kadugayan niya og gukod naputol ang usa ka takong.
Naabtan ra hinuon ni Degamo si Bastatas sa Carreta human dunay mitabang nga motoristang mipasakay kaniya dihang nakit-an kining nagtiniil nga nagpunay og gukod sa mga tulisan.
Nabawi ni Degamo ang bag ug armas samtang nidagan ang kauban ni Bastatas bisan paman nga gipasalbahan kini sa armas ni Degamo.
Samtang si Din nga sakop sa Mobile Patrol Group naatol nga diha sa sulod sa Jonas Borces Beauty Studio niadtong Marso 15 sa gabii dihang misulod ang duha ka armadong tulisan.
Si Din bisan gipahapa nakahimo pagbunot sa iyang armas ug nakigpinusilay sa mga tulisan hinungdan nga napatay niini ang gidudahang tulisan nga giingong sakop sa Military Intelligence Group 9 nga si Rico Lumantas.
Gipanghimakak hinuon sa militar nga ilang sakop sa Lumantas. Si Din niadtong higayona natapsingan sa iyang pulsohan ug likod human makigsinukliay og bala kang Lumantas sa distansyang gibana-banang duha ra ka metros.
Si Lumantas nga taga Zamboanga City patay diha-diha samtang duha niini ka mga kauban daling nakaikyas ug gituuhang nakapauli na sa Mindanao apan usa sa gidudahang lokal nilang kakunsabo nga nagbase diha sa Talamban nadakpan ug narekober usab ang armas nga gituuhang gigamit sa engkwentro.
Ang pagsukol sa duha ka mga polis miresulta sa pagkapakgang sa posibleng mosunod pang mga krimen nga mahimo sa mga suspek hinungdan nga gipasidunggan sila ni PRO7 director, Chief Supt. Silverio Alarcio,Jr. kagahapon.
Si Din gihatagan og Medalya ng Kagalingan samtang si Degamo gihatagan og Medalya ng Papuri sa pinasidunggang dinapit nga si Fr. Carmelo Diola, ang director sa Dilaab ug Abag Sugbu.