Modernong San Nicolas Police Station subhan na

Karon nang liwas sa Semana Santa ipahigayon ang ground breaking ceremony sa bag-o ug modernong police station diha sa Tabo-an nga gigahinan og P4 milyones.

Gibutyag ni Konsehal Procopio "Coping" Fernandez tsirman sa committee on police fire and penology, nga ang modernong Tabo-an Police Station anha pabarugon tupad nga bahin sa Pasil Fish Market.

Kini maoy ikatulo nga police station dinhi sa dakbayan nga gibag-o human gilusad ang programa sa kagamhanan sa dakbayan sa Sugbo nga "adopt a police station program" nga nag-tap sa Cebu Chamber of Commerce and Industry (CCCI).

Ang tuyo ug tumong niini nga ang mga negosyante maoy moabaga alang sa gastuhan pagbag-o sa mga karaang presinto sa kapolisan dinhi sa dakbayan human mahibaw-i nga walay igong pundo ang nasudnong kagamhanan alang niining maong katuyoan.

Ang unang presinto sa kapolisan nga nakabenepisyo niining maong programa mao ang gibag-o na karon nga Mabolo Police Station nga giusa sa usa ka fire substation sa maong lugar ug ang ikaduha niini nga mao ang Waterfront Police Station.

Si Bise Mayor Michael Rama, tsirman sa Police Coordinating and Advisory Council (PCAC) maoy nagpasiugda niining maong proyekto