Consultants ni Gwen, 'resign'

Giklaro ni Gobernador Gwendolyn Garcia nga iyang gikonsiderar nga resign sa ilang puwesto ang iyang mga consultant diha sa Kapitolyo nga magpapili karong eleksyon sa Mayo.

Ang maong lakang gitumong ni Garcia isip tubag sa gipatuman karon sa mga kadagkuan sa Commission on Election sa (Comelec) nga makapadayon sa ilang mga gimbuhaton ang mga consultant hangtod sa eleksyon.

Ang gobernador miingon nga gikonsiderar nga resign na ang iyang amahan nga si kanhi Gobernador Pablo Garcia isip consultant on political affairs human usab kini makaduso sa kandidatura niini sa pagka-kongresista sa ikaduhang distrito, apil na ang iyang igsuon nga si Atty. Pablo John Garcia isip consultant sa information and communication kinsa magpapili usab nga kongresista sa ikatulong distrito sa lalawigan ug ang consultant on barangay affairs nga si kanhi bokal Julian Bacus Daan kinsa magpapili pagbalik sa pagka-bokal.

Giklaro sa gobernador nga gitumong kini niya alang sa delicadeza gumikan kay dili siya buot nga ang tulo ka mga nahisgutang consultant mapasanginlang ilang gigamit ang ilang posisyon sa politikanhong interes.