Palit-botos gihimakak ni Guardo

Hugtanong gihimakak ni Jonathan "Atan" Guardo, pilionon pagka-Kongresista sa South district sa dakbayan sa Sugbo, ang mga pasangil nga paliton nila ang mga botante atol sa eleksyon.

Gibutyag ni Guardo dihang nahinabi sa mga tigbalita nga wala siyay salapi nga gastohon aron ipamalit og botos ug gituohan niya nga gihimo lang kining isyu batok kaniya sa iyang mga kaatbang sa politika.

Giangkon ni Guardo nga duna na siyay kapin 20 mil ka mga leaders sa south district nga maoy iyang gisaligan nga motabang niya sa pagpadaug sa umaabot piniliay.

Si mayor Tomas Osmeña una nang nipadayag nga iyang tutukan ang South district aron lang kapugngan nga dili makadaog si Guardo pagka-Kongresista.

Alang kang Guardo nahadlok na ang kampo sa BOPK nga iyang pildihon ang kandidato niini nga si Kongresista Antonio Cuenco hinungdan nga gitabangan siya karon og daot mapildi lang sa umaabot piniliay.

Gitug-an ni Guardo nga pagkakaron duna nay daghang mga opisyal ug lider sa BOPK sa 34 ka mga barangay sa South district ang nibali og suporta ngadto kaniya.

Kini wala pay labot sa 8 ngadto sa 10 ka mga barangay kapitan nga kaalyado sa BOPK nga pormal nga mo-anunsiyo sa ilang pagsuporta ngadto sa Tribu Guardo pipila ka adlaw sa dili pa ang eleksyon.

Nasayran nga pagkakaron duna pa lay pipila ka mga barangay kapitan ang nikunpirmar nga atua sa habig ni Guardo nga gilangkoban nila ni Pardo barangay captain Danilo Lim ug Jose Navarro sa Punta Prinsesa nga pulos kandidato pagka-konsehal, Victoriano Go sa Pahina San Nicolas ug Romeo Ocarol sa Pasil.