Special units ipakatap sa CPPO

Ipakatap karong adlawa ang dul-an usa ka gatos ka mga polis inabagan sa 703rd Provincial Mobile Group, K-9 dogs, Bomb Squad ug duha ka team sa Special Reaction Unit (SRU) ngadto sa isla sa Bantayan Island alang sa kahapsay ug kalinaw atol sa Mahal nga Adlaw.

Si Cebu Provincial Police Office Director, Sr. Supt. Carmelo Valmoria nagkanayon nga ang tulo ka mga lungsod sa Madridejos, Sta. Fe ug Bantayan butangan og dugang polis aron i-deploy sa matag eskina tungod sa gipaabot nga pagdagsang sa mga bakasyonista.

Ang K-9 dogs anha sa mga pantalan sa San Remegio ug Hagnaya ibutang.

Karong Biyernes Santo, tutukan sa mga polis ang Bantayan diin kasagaran magpunsisok ang katawhan tungod sa ilang pista.

Lakip sa gimando ni Valmoria nga higpitan ang pagbantay sa mga simbahan ug pagbutang og check points.