Gullas wa matarog nga 4 ang kaatbang

Wa mahulga si Kongresista Eduardo Gullas sa unang distrito sa Sugbu nga may upat ka mga kaatbang sa pagka-kongresista sa iyang distrito.

Matud pa ni Gullas nga anhi niya masukod ang ka-intelihente sa iyang mga konstituwente ilabi na nga ikaduha niya kining termino sa pagpasubli niya sa maong katungdanan sa maong lugar.

Ikasangka ni Gullas mao sila si kanhi Gobernador Enrique Rama, Ricardo Adlawan, Felipe Concepcion ug Alex A. Bolongaita.

Miingon si Gullas nga ang mga proyekto nga iyang nahatag sa siyudad sa Talisay, mga lungsod sa Minglanilla, Naga, San Fernando, Carcar, ug Sibonga maoy iyang handumanan sa mga katawhan sa maong mga lugar.

Busa alang kang Gullas nga ang mga tawo maoy angayang mohukom pinaagi sa ilang konsensiya kun si kinsa kanilang lima ang piliong moserbisyo kanila sa umaabot pang mga katuigan.

Si Gullas daang nag-alagad isip Kongresista sa unang distrito sukad sa unang mga katuigan sa 1990.

Nahuman ang iyang ikatulong termino niadtong 2001 ug gipulihan siya sa iyang manghod nga si kanhi Kongresista Jose "Dodong" Gullas.

Human niya masilbihe og usa ka termino sa pagka-mayor ang siyudad sa Talisay niadtong 2001-2004, mikandidato na usab siya pagbalik isip Kongresista sa unang distrito gikan sa 2004 hangtod karon.

Miingon si Gullas nga sa kadugay na niya sa politika wala siyay laing gilauman kun dili ang kaayo motimbangtimbang sa mga tawong iyang gialagaran bahin sa hustong pagpili og angayang lider.