ANAD partylist di "itoy" - Alcover

Kusganong gipanghimakak sa Alliance for Nationalism And Democracy (ANAD) nga sila mga 'itoy' sa gobiyerno ug militar sukwahi sa pasangil kanila sa mga militanteng partilistang naa sa Kongreso karon.

Ang national chairman sa ANAD nga si Jun Alcover mitug-an nga dili sakop sa militar ug Malacañang ang ANAD kung dili pundok kini nga nagtuo sa demokrasya ug kagawasan.

Hinuon giangkon ni Alcover nga pro-democracy ug pro-progress subay sa gitinguha sa gobiyerno ang ANAD apan wala magkahulugan mga 'itoy' na kini ug mosunod sa tanang imando sa kagamhanan.

"We are pro-government, pro-democracy but not necessarily pro-administration," pagklaro pang Alcover.

Matud pang Alcover ang ANAD panaghugpong sa mga tawong nagkahiusa nga dili gusto og kagubot pinaagi sa armas, mga welgang nakapagusbat sa ekonomiya ug ingon kontra terorismo ug komunismo.

Mipasangil ang ANAD nga ang mga progresibong militanteng pundok nga maoy nagpunay og himo og mga welga,rally ug mga piket sama sa Anakbayan, Bayan, Bayan Muna, Kilusang Mayo Uno ug uban pang progresibong grupo maoy tigpasiugda og kagubot sa nasud.

Ang ANAD maoy nalakip sa gitawag ni Akbayan Rep. Loreta "Eta" Rosales nga "government sponsored partylist" ug gitinguha nilang ipa-disqualify sa Comelec karong piniliay.

Ang ANAD kanhi gitawag og National Alliance for Democracy (NAD) ug makaduha na ka higayon nga napakyas nga makasulod sa kongreso niadtong piniliay sa tuig 2001 ug 2004.

Alang kang Alcover kung 'itoy' pa ang ANAD sa gobiyerno naglingkod na sila karon ug nagserbisyo sa katawhan ning mga panahuna.