Radaza di mosupak sa suspensyon

LapuLapu City Mayor Arturo Radaza malinawong midawat sa suspension order samtang nagsuot og pula nga arm-band ang mga empleyado sa City Hall timaan sa ilang pagsuporta sa mayor.

Matud pa ni LapuLapu City Administrator Teodolo N. Ybañez gisuroy usab sa mayor ang tanang mga empleyado ug mga department heads sa City Hall alang sa iyang pormal nga pagpanamilit sa mga empleyado kung mapatuman ang maong kamanduan.

Mga 11:45 kagahapon sa udto si Radaza miadto sa opisina ni Vice Mayor Norma Patalinghug aron ibilin ang renda sa City Hall sa naulahi kung moabot na unya ang suspensyon nga ihatud sa DILG-7.

Butang nga gikalipay ni Patalinghug ug nakita niini nga wala kini magplano og pagtisok og kasamok ug pagbabag sa maong order.

Matud pa ni Ybañez nga nahibalo nang daan si Radaza nga legal battle ang solusyon sa maong isyu ug dili kasamok sa mga supporters.

Samtang ang paghimo og mga vigil ug pagbutang og heavy equipment isip barikada wala tuguti sa mayor tungod sa kahasol niini sa trapiko ug transaksyon sa mga konstituwente sa dakbayan diha sa City Hall.

Hangtod ning pagsuwat sa balita nagpaabot pa gihapon si Radaza sa order gikan sa DILG 7 nga maoy gitahasan sa Ombudsman.

Apan si acting Deputy Ombudsman for the Visayas, Virginia Palanca Santiago sa interbyu sa DYRF kagahapon mibutyag nga hayan malutsan ni Radaza ang kasong administratiba subay sa Aguinaldo Doctrine.

Ubos sa Aguinaldo Doctrine mamahimong mapapas ang tanang kasong administratiba batok sa usa ka incumbent official nga subling makadaog sa eleksyon gumikan kay nasusamag gipasaylo sa katawhan ang iyang nahimong sala sa miaging termino.



Giklaro ni Santiago nga ang preventive suspension dili silot kundili gitumong kini aron dili ma-impluwensyahan ug ma-tamper sa nalambigit nga opisyal ang mga dokumentong gibasehan sa reklamo