Sikyu molansar pagka-kongresista

Usa ka security guard nga molupyo sa barangay Mabolo siyudad sa Sugbu ang pormal nga niduso sa iyang kandidatura pagka-kongresista sa north district atbang ni Kongresista Raul del Mar atol sa deadline sa filling sa certificate of candidacy kagahapong adlawa.

Alas 10:51 sa buntag nisang-at sa iyang COC si Juan Umacob Arinasa, 57 anyos, sa buhatan ni City Election Officer for the North Atty. Marchell Sarno.

Si Arinasa nga nahinabi sa mga tigbalita nipadayag nga dili siya modawat og sweldo sa higayon nga buligan ug mapili pagka-kongresista.

Apil sa plata porma de gobyerno ni Arinasa mao ang pagbahin sa iyaha unyang countrywide development funds diin ang 50 porsiyento niini igasto niya pagpatukod og mga housing program sa mga squatters ug ang laing 50 porsiyento gastuhon pagtukod og livelihood program sa mga prostitute aron masumpo ang problema sa prostitusyon sa dakbayan.

Gipasalig sab ni Arinasa nga mopasar og balaod nga mag-obligar nga pahatagan og sweldo nga dili muminos tag P10 mil kadtong mga tanod og health workers sa kabarangayan.

Gawas niini gipasaligan sab niya ang mga PUJ ug taxi drayber nga paningkamotang mapapas na ang bayranan sa ilang pag-apply ug pag-renew sa ilang mga lisensiya.

Nasayran nga si Arinasa una nang nilansar pagka kongresista niadtong nilabay'ng 2004 election apan gipildi kini ni del Mar.