Cebu himuong Special Economic Zone

Si Kongresista Eduardo Gullas moduso na sa house bill numero 5857 karong Hulyo atol sa 14th Congress nga maghimong Special Economic Zone sa lalawigan sa Sugbu.

Ang Kongresista mibutyag kagahapon sa mga tigbalita nga ang nahisgutang bill napaubos na sa duha ka public hearing kinsa ang Department of Finance, Tourism, Trade and Industry ug Central Bank ang mitambong niini.

Gitataw sa Kongresista nga ang nahisgutang bill makahatag og pabor sa tibuok lalawigan tungod kay posibleng adunay daghang investors ang moanhi para mobutang og negosyo nga mangahulogang daghan unyang trabaho alang sa mga Sugbuanon.

Base sa Section 4 (f) sa maong bill nga ang mga motukod og establisamento sa Cebu Ecozone mobayad lang og tres porsyento sa ilang gross income ngadto sa kagamhanan sa probinsiya diin usa ka porsyento niini ngadto sa probinsiya, usa ka porsyento ngadto sa kabarangayan nga sakop sa probinsiya para sa mga development fund ug improvement sa mga barangay ug usa ka porsyento usab ngadto sa Cebu Ecozone Authority.

Ang Board of Directors sa Cebu Ecozone Authority langkuban sa administrador sa Ecozone nga maoy himuong tsirman sa board ug ang Vice-chairman naggikan sa nasyonal nga ahensiya kinsa tahasan nga mo-coordinate ug mag-monitor sa economic zones.

Ang unom ka miyembro sa board langkuban sa congressional representative, gobernador sa Probinsiya sa Sugbo, usa ka representante sa Provincial Board, usa ka representante sa mga foreign investors sa Cebu Ecozone ug usa ka representante gikan sa sektor sa mga mamumuo kinsa gipili sa mga kawani sa Ecozone.