Duna nay kaatbang si Gwen

Usa ka babaye ang ikaatbang ni Gobernador Gwendolyn Garcia alang sa pagka-gobernador karong eleksyon ning tuiga human si Joyce Osmeña, 42, nga taga San Miguel Pusok, Lapu-Lapu City miduso sa sertipiko de kandidatura niini kagahapon sa alas 9:50 sa buhatan ni Comelec Provincial Election Supervisor, Edwin Cadungog.

Si Osmeña kuyog sa iyang bana nga si Rico Osmeña, duha ka mga anak miduso sa iyang certificate of candidacy isip usa ka independente nga kandidato human usab makaduso si Gobernador Garcia sa iyang COC nianang pagka alas 9:30 sa kabuntagon.

Si Osmeña dihang nahinabi sa mga sakop sa media mipadayag nga nakahukom siya sa pagdagan sa pagka-gobernador gumikan kay gusto kining mo-serbisyo sa katawhang Sugbuanon gani kun buligan kini sa iyang gitinguha iyang paninguhaon nga mahusay ang kaguliyang tali sa lalawigan ingon man sa dakbayan sa Sugbu labot sa Ordinance 93-1 sa luna nga gipanag-iya sa lalawigan.

Iyang gipanghinaot nga bisan tuod kun wa siya insaktong pundo sa iyang kandadatura anaa na sa katawhan sa lalawigan sa Sugbu ang paghukom kung kinsay ilang pilian.

Samtang si Gobernador Garcia sa iyang bahin mihangop sa kandidatura ni Osmeña ug mipadayag nga andam siya'g bisan si kinsa ang iyang ikaatbang tungod kay ang katawhan maoy maghukom sa eleksyon.

Sa pagkakaron, bugtong si Osmeña palang maoy opisyal nga magtige sa kapitolyo pagka-gobernador apan gipaabot nga mosang-at sa ilang mga COC sila si kanhi Kongresista Celestino "Junie" Martinez ug Rep. Antonio Yapha nga daan nang mipadayag og tinguhang makig-atbang kang Garcia.