Kapitan Joel Garganera "gipaluyuhan" og dagkong tawo

Kombinsido si Mayor Tomas Osmeña nga dunay mga politiko nga nagpaluyo ni Tinago barangay captain Joel Garganera sa pagsang-at og kaso batok niya tungod sa pasangil nga illegal nga pagpa-abang ug pagbaligya sa mga luna sa South Reclamation project (SRP) ngadto sa mga negosyante.

Hinuon nagdumili pagtug-an si Osmeña kun si kinsa ang mga tawo nga nahibaw-an niining nagpaluyo kang Garganera.

Si Garganera pormal nga nisang-at og kaso batuk sa mayor niadtong nilabay'ng hapon aron pugngan kini nga makabaligya ug paabang sa mga luna sa SRP nga ilang gihulagway wala pay congressional authority.

Sila si Atty. Lito Astillero ug Atty. Noel Adlawan maoy mga abogado ni Garganera sa gisang-at niining kasong prohibition batuk kang Osmeña.

Hinoon padayung gibarugan sa mayor nga dili tinuod nga walay congressional authority ang pagtugyan ni Presidente Gloria Arroyo ngadto sa siyudad sa SRP tungod kay cover kini sa bilateral agreement tali sa gobyerno sa Pilipinas ug Japan.

Hinuon gihikling lang una sa mayor ang pagpa-abang ug pagbaligya sa mga luna sa SRP ngadto sa mga magpapatigayun human sa eleksyon.

Apil sa mga dagkong negosyante nga nakignegosasyon sa siyudad nga mopalit og luna sa SRP naglangkob sa Big Foot Company, Fil-invest ug ang SM Prime Holdings nga gusto og joint venture tali sa siyudad.