Duha gipatay sa tulisan

Patay ang duha ka tawo usa kanila babaye samtang naangol usab ang laing babaye human sa nahitabong tulis diha sa Sitio Kulo, Pajac dakbayan sa Lapu-Lapu sa milabay'ng gabii.

Ang namatay giilang sila si Richel Dejito, 18, dalaga, lumad nga taga barangay Kurba lungsod sa Medellin nagtrabaho sa usa ka lotto outlet ug si Ramil Lucot Orong, 23, minyo, lumad sa New Piñan, Zamboanga del Norte, usa ka tricycle driver samtang ang samaran mao si Rossana Oldarita Balatero, 27, minyo, lumad sa Daguhoy Bohol kauban ni Dejito sa trabahuan.

Base sa imbestigasyon ni SPO2 Rolito Jumao-as ug PO3 Manolito Abellanosa nasayran nga mga alas 8:15 kagahapon sa gabii gikan sa ilang lotto outlet sa Tamiya, Basak dakbayan sa Lapu-Lapu sila si Dejito ug Balatero pauli na sa ilang gipuy-an sa Camella Homes sa Pajac luwan sa traysikol nga gimaneho ni Orong.

Matud pa ni Balatero nga usa ka pasaherong lalaki ang naglingkod sa likod ni Orong niadtong tungura ug pag-abot sa Sitio Kagudoy, Basak laing tawo ang mipara ug misakay sa extention sa sidecar sa maong de-pasaheroang motor.

Pag-abot sa gihitaboan gikatahong mipara ang maong pasahero ug walay daghang pahimangno kalit nga mibunot og wala matinong kalibre sa armas dayong mipusil kang Dejito tumong sa ulo ug gikuha ang bag nga gidala niini.

Human pusila si Dejito gipusil usab sa suspek si Orong diin naigo usab sa iyang ulo ug napusilan usab si Balatero dayong nagdali og pangikyas ngadto sa wala matinong direksyon, si Balatero natabang ug nadala sa Mactan Doctor's Hospital apan sila si Dejito ug Orong dead on the spot.

Sumala pa sa agalon ni Dejito nga si Felix Angana kapin lang sa 15 mil ka pesos ang nakuha sa mga tulisan niadtong tungura nga gisulod sa gidalang bag ni Dejito. Ang kapolisan padayon pa karong mihimo og dugang pakisusi sa maong brutal nga pagpanulis.