61-anyos giunay og patay sa ig-agaw

Patay dihadiha ang usa ka tiguwang lalaki dihang giunay pagdunggab sa iyang ig-agaw samtang naglingkod sa bangko atubangan sa tindahan sa igsuon babaye sa miaging gabii pasado alas 8 sa Sitio Bas, Perelos Carcar Cebu.

Ang biktima giila sa kapolisan nga si Wilfredo Mancao, 61, ulitawo kinsa nakaangkon og duha ka samad diha sa walang dughan ug ubos nga bahin sa walang ilok ug residente sa maong dapit.

Ang gitumbok nga midunggab sa biktima nailhan sa kapolisan nga si Gomer si Wamar kinsa nakaikyas human sa hitabo.

Base sa pasiunang imbestigasyon ni SPO3 Jonas Pananganan didto sa crime scene nasayran nga ang biktima naglingkod sa bangko sa tindahan sa iyang igsuon.

Apan pagka taud-taod Wamar miabot nga may dalang hinagiban ug sa walay daghang pangutana gihansakan ang biktima makaduha ka higayon.

Si SPO3 Pananganan nga nahinabi sa Banat News mibutyag nga ang sinugdanan mao ang yuta sa biktima nga kabilin sa mga ginikanan diin gibutangan sa basketball court.