P4.1M tseke para lacion gigisi ni Gob.

Balor og P4.1 milyones nga kantidad sa mga tseke alang sa proyekto sa Consolacion gigisi-gisi ni Gobernador Gwendolyn Garcia atubangan ni Mayor Avelino Gungob sa maong lungsod.

Gihimo kini sa gobernadora human niya kasab-i si Gungob tungod sa iyang pagbiya kang Kongresista Nerissa Soon-Ruiz.

Si Gungob mitug-an sa mga tigbalita atol sa iyang pormal nga paghurar uban sa iyang line-up ngadto sa partido Lakas-CMD atubangan ni Bokal Gabriel Luis "Luigi" Quisumbing nga district chairman sa maong partido didto sa Norkis Clubhouse sa Mandaue, nga ang maong gahin alang unta sa mga proyekto ug maintenance sa 21 ka barangay ug sa munisipalidad sa Consolacion.

Sa P4.1 milyones, P2.1 milyones niini gitagana unta alang sa lungsod samtang ang P2 milyones alang sa mga barangay nga gitagan-an unta og P100 mil matag usa.

Si Capitol consultant Pablo John Garcia mihimakak sa pasangil ni Gungob nga gigisi sa iyang igsuon ang tseke nga alang unta sa Consolacion.

Matud pa ni Pablo John nga nagpataka lang og estorya si Gungob. Giklaro ni Pablo John nga ang tseke ug voucher anaa sa iyang posesyon ug wala kini magisi sukwahi sa pasangil sa mayor.

Sumala pa ni Pablo John nga namakak si Gungob sa iyang pasangil.

Si Gungob nagduda nga nasuko kaniya si Garcia human kini nasayod nga mibiya na kini og suporta ni Soon-Ruiz ug mibali sa iyang suporta kang Luigi Quisumbing sa milabay'ng semana.

Mitug-an usab si Gungob nga siya gikasab-an ni Garcia niadtong milabay'ng Huwebes (Marso 22) sa iyang buhatan gumikan sa maong kalambuan. Gihulagway ni Gungob si Garcia nga usa ka diktador gumikan kay unsay iyang gusto maoy masunod. Si Gungob gitangtang na sa partido One Cebu nga sakop sa Kampi.

Matud pa ni Gungob nga bisan pa nga siya misuporta kang Quisumbing pagka-kongresista sa siksto distrito sa umaabot nga piniliay, ipabilin unta niya ang iyang suporta kang Garcia. Apan gumikan sa maong hitabo nakahukom si Gungob ug mga kauban nga mopasakop sa partidong Lakas-CMD.

Mibahad si Gungob nga iyang pildihon si Garcia sa iyang lungsod kini human ang 19 ka mga kapitan sa barangay lig-ong nagsuporta sa kandidatora ni Gungob ug sa mga kaubanan.

Kagahapon pormal nga nanumpa sa partidong Lakas-CMD sila si Gungob, Konsehal Ember Alinsug pagka-bise mayor, alang sa pagka-konsehal Jerson Maraño, Analee Gungob, Benny Abucay, Besil Mangubat, Atty. Franco Pagaran, Ben Tibon, Turo Quimod ug Eluminado Alin.