Nanion, namunal og armas natingkagol

Nanion ug namunal sa armas ang nadakpan sa kapolisan kinsa mag-atubang og kaso nga grave threats, ilegal nga paghupot sa armas ug kalapasan sa Comelec Gun Ban.

Ang pagpanion ug pagpamunal sa armas nahitabo sa miaging gabii sa Perez Compound, Maguikay, dakbayan sa Mandaue.

Si PO2 Renato Berdon ug PO2 Julito Bequilla sa kapolisan sa Presinto 4 sa Casuntingan Police Station miila sa suspetsado nga mao si Julito Perez, 45 anyos, minyo ug nagpuyo sa maong dapit.

Sa nasayran sa Banat News kang PO2 Berdon nga usa ka Paquito Alquisa, hingkod ang panuigon ug silingan sa suspetsado ang iyang gitionan sa armas ug gibunalan sa ulo.

Nahitabo ang pagdinumogay dihang misukol ang biktima hangtod nga nailog ang armas.

Dali nga nakatubag sa maong alarma sila si PO2 Berdon human ang pipila ka mga silingan nakatawag sa ilang buhatan alang sa pagpangayog panabang.

Gitahan ni Alquisa ang suspetsado sa kapolisan uban sa nasakmit niining armas nga kalibre 38 nga walay lisensiya nga maoy nakaingon sa pagkabalhog niini sa bilanggoan.