Lalaki gi-‘salvage’

Wala pa mailhing lalaki ang gipusil patay sa ibabaw sa Marcelo Fernan Bridge kagahapon sa buntag.

Matud pa ni PO1 Charlie Rubio, desk officer sa Station 5 sa Mandaue City Police Office nga hangtod ning pagkutlo ning balita wala pa gihapon mailhi ang tawo nga gipusil patay sa ibabaw sa ikaduhang taytayan nga nagkutay sa dakbayan sa Lapu-Lapu ug Mandaue.

Ang Station 5 nakadawat og alarma mga alas 6 kagahapon sa buntag nga usa ka lalaki ang gikatahong gipusil sa wala usab mailhing mamumuno ug ang biktima gihulagway lamang sa iyang pangedaron nga 28 pataas, nag-t-shirt ug gray nga adunay markang "Shaq 32" ug nag-short pants ug violet, itom ug tsinelas ug walay nakuhang ID o pitaka sa iyang posesyon.

Atol sa pagresponde sa mga sakop sa Station 5 ug sa Scene of the Crime Operation uban ni Chief Insp. Roderick Pamsal, nakuha sa lugar ang duha ka basiyo sa kalibre .45 nga posibleng maoy gigamit sa pagpusil sa lalaki nga namatay diha-diha.

Wala pa usab matino sa kapolisan ang motibo sa maong pagpamusil gawas lamang sa ilang pagpadayon sa imbestigasyon aron sa pag-ila sa responsableng mamumuno sa biktima.